O BNG logrou a unanimidade do Pleno de Ponteareas para instar á Xunta a adxudicar de inmediato o contrato para iniciar as obras da primeira fase da rede de saneamento de Ribadetea, licitar a segunda fase e redactar os proxectos das fases pendentes.

A concelleira Cristina Fernández puxo en valor os avances logrados durante o goberno liderado polo BNG, e destacou a contratación con fondos propios do proxecto da segunda fase. Ademais, lembrou que, grazas ao acordo acadado no pasado mandato entre Concello, Xunta e Estado, a obra de ampliación da Depuradora da Moscadeira xa está na súa fase final tras un investimento millonario, polo que xa poderán conectarse as redes pendentes de execución.

“É o momento de adxudicar dunha vez as obras da primeira fase, que xa foron sacadas a concurso público en febreiro, sacar a concurso a execución do proxecto da segunda fase e elaborar os proxectos das fases restantes para completar a rede de saneamento de Ribadetea”, propuxo a concelleira do BNG, obtendo o apoio de todos os grupos políticos da Corporación.

Fernández concluíu agradecendo a labor da veciñanza de Ribadetea, especialmente a organizada na Plataforma veciñal, “que leva anos reclamando este dereito básico e impulsando todos os avances que se produciron”. Así mesmo, a líder do BNG lamentou a “hipocrisía do PP, que a pesar de votar a favor no Pleno, ten demostrado o seu engano constante á veciñanza de Ribadetea, con promesas que despois non cumpren, realizando anuncios propagandísticos segundo lles convén electoralmente e enredando para atrasar esta infraestrutura vital”.