O BNG vén de informar da intención do goberno de Nava Castro de solicitar á Xunta un préstamo de 760.000 euros para financiar a primeira fase das obras dun módulo de atletismo de 60 metros. Así mesmo, o Bloque destapou que o proxecto conta con dúas fases máis, sumando un investimento total de 4,4 millóns de euros.

“Trátase dun capricho imposto pola alcaldesa e o tenente de alcaldesa polos seus propios intereses, que conta co rexeitamento maioritario da comunidade atlética ponteareá, que reclama unha pista de atletismo de 400 metros e non unha recta de 60 metros”, sinalou a líder do BNG e candidata á alcaldía de Ponteareas, Cristina Fernández Davila. “Néganse a escoitar a comunidade deportiva e poñen a propaganda por diante das necesidades do atletismo ponteareán”, lamentou Fernández Davila.

Así mesmo, o BNG cuestiona que se dediquen millóns de euros a caprichos mentres as necesidades reais das veciñas e veciños continúan sen atender. “O rural segue sen o saneamento prometido e as infraestruturas básicas acumulan carencias, pero o goberno de Castro e a dereita pretenden despilfarrar máis de 4 millóns de euros nunha instalación que non resolve as necesidades da comunidade atlética”, afirmou Cristina Fernández.

O BNG explicou a previsión do goberno local para estas obras. A primeira fase, que conta con financiamento de 840.000 euros da Deputación de Pontevedra, engloba a estrutura xeral e a recta de velocidade cuberta, cun orzamento de 1,6 millóns de euros e un período de execución de 4 meses desde a súa adxudicación. A segunda fase, cun prazo de execución de 6 meses e destinada á construción xeral pechada, supera os 1,55 millóns de euros. Por último, a terceira fase, que abordaría as instalacións e os acabados, supera os 1,2 millóns de euros.

“Primeiro anunciaron como espectacular unha pista ovalada de 200 metros; a comunidade atlética reclama unha de 400 para que sexa realmente útil. En vez de atender esas peticións, o goberno de Castro pretende gastar aínda máis diñeiro nun cambio a peor, consistente nunha simple recta cuberta de 60 metros”, subliñou o BNG.

Como alternativa de goberno, o BNG comprométese a situar as prioridades da veciñanza no centro da acción política, apostando por unha planificación rigorosa dos investimentos e por un diálogo permanente cos colectivos afectados antes de impulsar grandes proxectos. “Ponteareas precisa un goberno que escoite, que planifique con responsabilidade e que destine os recursos públicos a atender as necesidades reais das persoas. En 2027 a veciñanza terá a oportunidade de elixir un cambio para deixar atrás os caprichos e a propaganda e conformar un goberno que traballe pensando no interese xeral”, concluíu Cristina Fernández Davila.