O BNG vén de anunciar a adopción de medidas legais contra o goberno de Ponteareas ante ao escándalo da contratación dos valados para pechar as rúas en Corpus, “que desembocou nunha trama de irregularidades e tramitacións indebidas, como a contratación a dedo dunha empresa para realizar o traballo adxudicado legalmente a outra”.

“Tras esgotar a vía administrativa sen que o Concello dese resposta ás preguntas formuladas polo BNG, decidimos presentar unha denuncia ante a Fiscalía para esclarecer o caso e depurar responsabilidades, practicando as correspondentes investigacións para exercitar, no seu caso, as accións penais oportunas contra as persoas responsables”, sinalou o Bloque.

O grupo líder da oposición lembrou que “o goberno local sacou a concurso público un contrato para o valado das rúas no percorrido das alfombras de Corpus, que incluía a perforación das rúas, a confección de 1.400 valos, a súa instalación, a desmontaxe e o posterior tapado dos buratos, incluíndo a subministración de 1.400 tapas. Adxudicaron o contrato por 80.000 euros á empresa gañadora do concurso, pero paralelamente contrataron a dedo outra empresa para facer parte do mesmo traballo, o que supuxo destinar outros 14.500 euros á colocación das tapas que xa estaban incluídas no anterior contrato e tiña que aportar a empresa inicial”

Finalmente, foi esta empresa contratada a dedo, constituída uns días antes, a que ademais de subministrar as tapas realizou todo o traballo que lle correspondía á empresa adxudicataria. Ademais, “antes de adxudicalo a dedo, o goberno solicitou tres ofertas para a subministración das tapas a tres profesionais a sabendas de que gardaban relación entre si, sumando unha nova irregularidade e convertendo o proceso de contratación nun auténtico paripé para aparentar que o procedemento era correcto”, segundo puido comprobar o BNG nos expedientes aos que tivo acceso.

“O goberno de Nava Castro e Juan Carlos González terá que dar explicacións das súas manobras turbias e das tramitacións indebidas para pagarlle a dúas empresas por un mesmo traballo cando só o realizou unha delas. Xogan cos cartos da veciñanza para satisfacer os seus caprichos e beneficiar aos seus en vez de destinalos a satisfacer as necesidades de Ponteareas”, afirmou o Bloque.

Irregularidades nun xantar de Corpus

Outra das irregularidades que o BNG denuncia está relacionada cun xantar institucional organizado polo goberno nunha finca particular para delegacións convidadas ao Corpus, cargos políticos e familiares. O Bloque solicitou no pasado mes de xuño acceso aos datos desta comida, e o goberno denegou o acceso á información alegando que non se emitira ningunha factura. “Agora, o PP afirmou que foi gratuíto por unha colaboración solidaria ofrecida por veciños particulares, sen que haxa documentación que apoie esta actuación, nin explicación das condicións nas que o Concello realizou convites a unha finca privada nin as garantías legais do xantar”, denuncia a formación nacionalista.

“A administración pública debe actuar conforme aos principios de legalidade, transparencia e bo uso dos recursos públicos. Neste sentido, un evento organizado polo Concello e financiado integramente por particulares debe cumprir con certos requisitos e limitacións que neste caso non se cumpriron”, conclúe o BNG.