O portavoz nacional do BNG, Xavier Vence, realizou unha visita institucional ao concello de Ponteareas, onde mantivo unha reunión co sector forestal-madeireiro, acompañado dos membros dos goberno local que preside Xosé Represas e da deputada do BNG no Parlamento Galego Carme Adán.

Vence valorou a experiencia do goberno municipal, que está dando “transparencia e vigor ao concello, demostrando capacidade e iniciativas para resolver os problemas da veciñanza”.

O Portavoz Nacional do BNG fixo referencia á capacidade do goberno que lidera Represas para sacar adiante os orzamentos municipais, os primeiros desde 2010, “o que da idea da situación de parálise en que o PP tiña sumido ao concello”, alegou Vence, quen tamén salientou o feito de que a aprobación do Plan Xeral de Ordenación Municipal encara a súa recta final tras apenas catro meses de goberno, “unha tarefa longamente desexa polos veciños e veciñas”, indicou.

O BNG está sentando as bases dunha da dinamización institucional, social e económica da comarca

“Estamos vendo como se nota o impulso na vida municipal que trouxo a chegada do BNG ao goberno local, a apertura e o diálogo coa cidadanía e cos sectores produtivos”, puxo en valor o portavoz nacional. “Temos claro que o BNG está sentando as bases dunha dinamización institucional, social, e económica da comarca a través dos concellos de Ponteareas e As Neves”, recalcou.

Tras a reunión cunha nutrida representación de todos os axentes da cadea forestal e madeireira da comarca, Vence anunciou que o Bloque presentará unha batería de iniciativas parlamentarias recollendo os problemas expresados polo sector, “agravados como consecuencia da falta dunha política forestal e industrial acaida por parte da Xunta, que empezan mesmo polas trabas administrativas”.

A praga do nematodo é un problema moi mal xestionado pola Xunta e que está arrastrando ao sector forestal

“Un dos temas máis específicos é a praga do nematodo que afecta ao piñeiro, o que converte á comarca nunha zona de exclusión que impide a comercialización desta especie. Un problema moi mal xestionado pola Xunta e que está arrastrando ao sector forestal e a industria transformadora, polo que son necesarias medidas rápidas para solucionalo”, alegou Vence.

Igualmente, o BNG coincide co sector na necesidade de poñer en valor os montes en man común “porque son unha gran riqueza para a comarca de Ponteareas que está desaproveitada pola falta dunha estratexia forestal do Goberno de Feijóo”, denunciou.

A nivel local, o alcalde quedou comprometido a manter un novo encontro con todos os eslavóns do sector para poñer en marcha unha estratexia de visualización dos seus problemas. Reunión cos alcaldes, coa propiedade e coa industria transformadora que pedía “camiñar todos xuntos, propietarios, industria e transformación”.